ឯកឧត្តម ហឿន សំនៀង៖ វគ្គបំប៉នសមត្ថភាពផ្ទៃក្នុងស្តីពី “ការអភិវឌ្ឍភាពជាអ្នកដឹកនាំក្នុងវិស័យអប់រំ”គឺជាមូលដ្ឋានគ្រឹះដ៏សំខាន់បំផុតក្នុងការបំពេញបន្ថែមនិងបំពាក់បំប៉នថ្នាក់ដឹកនាំនិងមន្ត្រីរបស់វិទ្យាស្ថានតេជោសែនសាធារណការឱ្យមានចំណេះដឹង និងសមត្ថភាពកាន់តែល្អបន្ថែមទៀត

ឯកឧត្តម ហឿន សំនៀង៖ វគ្គបំប៉នសមត្ថភាពផ្ទៃក្នុងស្តីពី “ការអភិវឌ្ឍភាពជាអ្នកដឹកនាំក្នុងវិស័យអប់រំ”គឺជាមូលដ្ឋានគ្រឹះដ៏សំខាន់បំផុតក្នុងការបំពេញបន្ថែមនិងបំពាក់បំប៉នថ្នាក់ដឹកនាំនិងមន្ត្រីរបស់វិទ្យាស្ថានតេជោសែនសាធារណការឱ្យមានចំណេះដឹង និងសមត្ថភាពកាន់តែល្អបន្ថែមទៀត

ភ្នំពេញ៖ ការថ្លែងយ៉ាងដូច្នេះរបស់ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូនក្នុងឱកាសដែលឯកឧត្តមបានអញ្ជើញចូលរួមក្នុងពិធីបើកវគ្គបំប៉នសមត្ថភាពផ្ទៃក្នុង ស្តីពី “ការអភិវឌ្ឍភាពជាអ្នកដឹកនាំក្នុងវិស័យអប់រំ” ជូនដល់ថ្នាក់ដឹកនាំ និងមន្រ្តីរាជការនៃវិទ្យាស្ថានតេជោសែន សាធារណការ និងដឹកជញ្ជូន នាព្រឹកថ្ងៃចន្ទទី១៩ ខែកក្កដា ឆ្នាំ២០២១ ក្រោមអធិបតីភាពលោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន។

នាឱកាសនោះឯកឧត្តមនាយកវិទ្យាស្ថានតេជោសែនបានបញ្ជាក់ថា៖ កម្មវិធីបណ្តុះបណ្តាលនាថ្ងៃនេះ គឺជាការចាប់ផ្តើមតែប៉ុណ្ណោះ ដោយវគ្គបណ្តុះបណ្តាល ត្រូវបានបែងចែកជា៨វគ្គមានសរុបចំនួន ១៨មេរៀន ដែលបង្ហាត់បង្ហាញដោយវាគ្មិនកិត្តិយសនិងអ្នកជំនាញដែល មានបទពិសោធន៍ ជាច្រើនឆ្នាំលើមេរៀននីមួយៗរួមមាន៖
*គោលការណ៍នៃការងាររដ្ឋបាលក្នុងវិស័យអប់រំ និងប្រភេទនៃគោលការណ៍រដ្ឋបាលអប់រំ
*ទំនាក់ទំនងនៅក្នុងសាលារៀន និងរចនាសម្ព័ន្ធសាលារៀន
*ការគ្រប់គ្រងធនធានមនុស្ស និងការកសាងធនធានមនុស្សក្នុងវិស័យអប់រំ
*ការគ្រប់គ្រងខ្លួនឯង (Emotional Intelligence, IQ vs EQ)
*ការកសាងក្រុម និងការបង្កើតបរិស្ថានជម្រុញ (Team Building and Creating Enabling Environment for team members)
*ការអភិវឌ្ឍខ្លួនឯង (Self Development and Growth)
*ការគ្រប់គ្រង និងភាពជាអ្នកដឹកនាំក្នុងវិស័យអប់រំ (Educational Management and Leadership)
*ការរៀបចំឱ្យផ្នត់គំនិតវិជ្ជមាន Fixed Mindset and Growth Mindset
*ការរៀបចំ និងអភិវឌ្ឍកម្មវិធីសិក្សា
*ការវាយតម្លៃ និងធានាគុណភាពផ្ទៃក្នុង (IQA)
*ការវាយតម្លៃ និងធានាគុណភាពខាងក្រៅ (EQA)
*វិធីសាស្ត្រដោះស្រាយទំនាស់ (Conflict Resultion)
*ការឆ្លុះបញ្ចាំងពីខ្លួនឯង និងភាពជាអ្នកដឹកនាំ (Anatomy *Self Reflection and Leadership) ក្នុងបរិបទនៃជំងឺកូវីដ-១៩ និងដើម្បីចូលរួមបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ វគ្គបណ្តុះ បណ្តាល នឹងត្រូវធ្វើឡើងផ្ទាល់សម្រាប់ថ្នាក់ដឹកនាំក្រោម១៥រូប និងមន្រ្តីរាជការដទៃទៀត ត្រូវបានចូលរួមតាមរយៈ ប្រព័ន្ធអនឡាញ។

ជាមួយគ្នានោះដែរលោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូនបានថ្លែងថា៖ដោយមានការយកចិត្តទុកដាក់ខ្ពស់ ក្នុងការធានាឱ្យវិទ្យាស្ថានតេជោសែន សាធារណការ និងដឹកជញ្ជូន ទទួលបានជោគជ័យស្របតាមចក្ខុវិស័យ និងបេសកកម្មរបស់ខ្លួន ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណរការ និងដឹកជញ្ជូន បានជម្រុញ និងគាំទ្រដល់ការបណ្តុះបណ្តាលអភិវឌ្ឍធនធានបុគ្គលិក មន្រ្តីរាជការ គ្រូបង្រៀន និងសាស្រ្តាចារ្យ របស់វិទ្យាស្ថាន ឱ្យមានសមត្ថភាពខ្ពស់ សំដៅបម្រើដល់ការបណ្តុះបណ្តាល សិស្ស និស្សិត និងសិក្ខាកាម ឱ្យក្លាយទៅជាធនធានមនុស្ស ប្រកបដោយជំនាញច្បាស់លាស់ ចំណេះដឹងទូលំទូលាយ និងមានសក្ដានុពលខ្ពស់ សម្រាប់រួមចំណែកអភិវឌ្ឍសង្គមជាតិជាមួយរាជរដ្ឋាភិបាល និងជាធនធានមួយដ៏ខ្លាំងពូកែ ដែលនឹងប្រកួតប្រជែងក្នុងទីផ្សារជាតិ និងអន្ដរជាតិនាពេលអនាគត។

ទន្ទឹមនឹងនេះលោកជំទាវរដ្ឋលេខាធិការក៏បានជម្រុញ និងលើកទឹកចិត្តដល់មន្រ្តីទាំងអស់ ចូលរួមក្រេបយកចំណេះដឹងឱ្យបានច្រើនបំផុត និងចូលរួមយ៉ាងសកម្មជាមួយនឹងគ្រូឧទ្ទេស ក្នុងវគ្គបណ្តុះបណ្តាល នីមួយៗ ដែលនឹងប្រព្រឹត្តទៅរយៈពេលសរុប ៦៤ម៉ោង ដ៏មានអត្ថន័យនេះ ដើម្បីរួមគ្នាកសាងមូលដ្ឋានគ្រឹះ វិទ្យាស្ថានតេជោសែន សាធារណការ និងដឹកជញ្ជូន ឱ្យកាន់តែរឹងមាំ និងអាចបំពេញការងារ របស់ខ្លួនកាន់តែមាន ប្រសិទ្ធភាពខ្ពស់ថែមទៀត ក៏ដូចជាបានជាទុនបន្ថែមទៀត សម្រាប់ជួយជម្រុញគុណភាពអប់រំរបស់វិទ្យាស្ថាន ឱ្យមានការទទួលស្គាល់ និងល្បីល្បាញ ទាំងនៅថ្នាក់ជាតិ ថ្នាក់តំបន់ និងអន្តរជាតិ នាពេលខាងមុខ។

សូមបញ្ជាក់ថា វិទ្យាស្ថានតេជោសែន សាធារណការ និងដឹកជញ្ជូន ត្រូវបានសម្ពោធដាក់ឱ្យប្រើប្រាស់ ជាផ្លូវការ កាលពីថ្ងៃទី២២ ខែមករា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ដោយបច្ចុប្បន្នវិទ្យាស្ថានមាននិស្សិត ជំនាន់ទី១ ចំនួន១៩១នាក់ បាននឹងកំពុងសិក្សាតាមប្រព័ន្ធអនឡាញ លើជំនាញចំនួន៦ ក្នុងដេប៉ាតឺម៉ង់ចំនួន៣ រួមមាន៖
*ទី១.ដេប៉ាតឺម៉ង់សំណង់សាធារណការ៖ លើជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ និងជំនាញប្រព័ន្ធចម្រោះទឹកកខ្វក់
*ទី២.ដេប៉ាតឺម៉ង់គ្រប់គ្រងដឹកជញ្ជូន និងភស្តុភារកម្ម៖ លើជំនាញសេដ្ឋកិច្ច និង គ្រប់គ្រងដឹកជញ្ជូនផ្លូវគោក និងជំនាញគ្រប់គ្រងភស្ដុភារកម្ម និងខ្សែច្រវ៉ាក់ផ្គត់ផ្គង់
*ទី៣.ដេប៉ាតឺម៉ង់នាវាចរណ៍៖ លើជំនាញបរិបាលនាវា និងម៉ាស៊ីននាវា ដែលកម្មវិធីសិក្សាពេញមួយថ្ងៃ (ព្រឹក/រសៀល) ៥ថ្ងៃក្នុងមួយសប្តាហ៍ (ចន្ទ-សុក្រ) ព្រឹកចាប់ពីម៉ោង ៧:០០ព្រឹក ដល់ម៉ោង ១១:០០ថ្ងៃត្រង់ និងរសៀលចាប់ពីម៉ោង ១:០០រសៀល ដល់ម៉ោង ៥:០០ល្ងាច៕

 

Share this post

Post Comment