ឯកឧត្តមទេសរដ្ឋមន្ត្រី ស៊ុន ចាន់ថុល ដឹកនាំក្រុមការងារបច្ចេកទេសក្រសួង បន្តចុះពិនិត្យស្ថានភាពទឹកជំនន់ដែលបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់នៅក្នុងខេត្តបាត់ដំបង និងខេត្តបន្ទាយមានជ័យ

ឯកឧត្តមទេសរដ្ឋមន្ត្រី ស៊ុន ចាន់ថុល ដឹកនាំក្រុមការងារបច្ចេកទេសក្រសួង បន្តចុះពិនិត្យស្ថានភាពទឹកជំនន់ដែលបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់នៅក្នុងខេត្តបាត់ដំបង និងខេត្តបន្ទាយមានជ័យ

 

បាត់ដំបង៖  ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃចន្ទ ទី១៩ ខែតុលា ឆ្នាំ២០២០ បានដឹកនាំក្រុមការងារបច្ចេកទេសក្រសួង បន្តចុះពិនិត្យស្ថានភាពទឹកជំនន់ ដែលបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់នៅក្នុងព្រះរាជាណាចក្រកម្ពុជា ជាពិសេសផ្លូវជាតិនៅក្នុងខេត្តបាត់ដំបង និងខេត្តបន្ទាយមានជ័យ ដោយមានការចូលរួមពីអាជ្ញាធរដែនដី និងបណ្ដាភាគីពាក់ព័ន្ធផងដែរ។

សូមជម្រាបជូនថា៖ ក្នុងរយៈពេលប៉ុន្មានថ្ងៃចុងក្រោយនេះ ជំនន់ទឹកភ្លៀងបានបន្តវាយលុកយ៉ាងខ្លាំងនៅបណ្តាខេត្តជាច្រើននៅក្នុងព្រះរាជាណាចក្រកម្ពុជា បណ្ដាលឲ្យប្រជាពលរដ្ឋចំនួន ២៥នាក់ បានបាត់បង់អាយុជីវិត បង្កមហន្តរាយដល់ទ្រព្យសម្បត្តិ និងមនុស្សរាប់ពាន់នាក់ផ្សេងទៀតត្រូវបានជម្លៀសរកទីទួលសុវត្ថិភាព បញ្ហានេះបានបង្កជាក្តីបារម្ភថា៖ គ្រោះធម្មជាតិនេះនាំឲ្យមានការខូចខាតសេដ្ឋកិច្ចកម្ពុជា ដែលកំពុងរងឥទ្ធិពលពីវិបត្តិជំងឺកូវីដ-១៩ ដែលមានស្រាប់ទៅហើយនោះ។ 

ស្ថានភាពជំនន់ទឹកភ្លៀងនេះបានបង្កផលប៉ះពាល់ដល់ហេដ្ឋារចនាសម្ព័ន្ធផ្លូវថ្នល់កម្ពុជា គិតត្រឹមថ្ងៃទី១៨ ខែតុលា ឆ្នាំ២០២០ បានបណ្តាលឲ្យផ្លូវថ្នល់ចំនួន ១២៣ខ្សែ មានចំនួន ៣០៨កំណាត់ និងមានប្រវែងសរុបចំនួន ៤០០ គីឡូម៉ែត្រ ក្នុងនោះផ្លូវដីក្រួសក្រហម ១៤០គីឡូម៉ែត្រ ត្រូវបានទទួលរងនូវការលិចលង់ ក្នុងនោះរួមមាន៖ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ និងបណ្ដាផ្លូវជាតិសំខាន់ៗជាច្រើនខ្សែថែមទៀតផងដែរ។

ថ្លែងទៅកាន់ក្រុមអ្នកសារព័ត៌មាន នៅក្នុងដំណើរបេសកកម្មចុះពិនិត្យផ្លូវ ដែលទទួលរងការខូចខាតដោយជំនន់ទឹកភ្លៀង ឯកឧត្តមទេសរដ្ឋមន្ត្រី បានចុះពិនិត្យនៅរង្វង់មូលយាយទេព ក្រុងបាត់ដំបង ខេត្តបាត់ដំបង និងឃុំថ្មពួក ស្រុកថ្មពួក ខេត្តបន្ទាយមានជ័យ ដែលមានស្ថានភាពទឹកជំនន់លិចខ្លាំង ដោយបានណែនាំឲ្យមន្ដ្រីជំនាញធ្វើការកាយប្រឡាយដើម្បីរំដោះទឹក សម្រួលចរាចរណ៍ ធ្វើដំណើរជូនបងប្អូនប្រជាពលរដ្ឋ និងធ្វើការពង្រីកប្រព័ន្ធលូបង្ហូរទឹកឱ្យបានធំជាងមុន ដើម្បីងាយស្រួលរំដោះទឹក ទប់ស្កាត់កុំឱ្យទឹកហូរកាត់ផ្ដាច់ផ្លូវ បង្កការជន់លិចទៅដល់ខ្នងផ្ទះរបស់បងប្អូនប្រជាពលរដ្ឋដែលឋិតនៅខាងក្រោមផ្លូវ។ 

ឯកឧត្តមទេសរដ្ឋមន្ត្រីបានជម្រាបជូនផងដែរថា៖ ក្រុមការងារជំនាញពាក់ព័ន្ធរបស់ក្រសួង នឹងចុះធ្វើបញ្ជីប៉ាន់ស្មានចំពោះទំហំការខូចខាតផ្លូវថ្នល់ទាំងអស់ នៅក្នុងព្រះរាជាណាចក្រកម្ពុជា ដើម្បីស្នើសុំកញ្ចក់ថវិកាយកមកជួសជុល នៅពេលទឹកស្រកទៅវិញភ្លាម។

ជាមួយគ្នានោះផងដែរ ឯកឧត្តមទេសរដ្ឋមន្ត្រី បានអំពាវនាវដល់ម្ចាស់យានយន្តដឹកជញ្ជូនធុនធ្ងន់សូមកុំបើកបរនៅលើផ្លូវទាំងឡាយដែលកំពុងទទួលរងការជន់លិច ពិសេសផ្លូវជាតិលេខ៥ ចំពោះរថយន្តដឹកទំនិញធំៗ ពីប៉ោយប៉ែត សូមធ្វើដំណើរវាងតាមផ្លូវជាតិលេខ៦ និងស្ដាប់តាមការណែនាំរបស់អាជ្ញាធរមាន សមត្ថកិច្ច ដើម្បីបង្ការកុំឲ្យហេដ្ឋារចនាសម្ព័ន្ធផ្លូវថ្នល់របស់យើងរងការខូចខាតកាន់តែធ្ងន់ធ្ងរថែមទៀត និងបានស្នើសុំការអភ័យទោសពីសំណាក់បងប្អូនប្រជាពលរដ្ឋ ចំពោះការបិទផ្លូវមួយចំនួន មិនឱ្យរថយន្តធុនធំធ្វើចរាចរណ៍ជាបណ្ដោះអាសន្ន ក្នុងគ្រាដ៏លំបាកនេះ។

ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានចុះចែកអំណោយជូនដល់ប្រជាពលរដ្ឋរងគ្រោះដោយទឹកជំនន់ចំនួន២០០គ្រួសារ នៅឃុំអូរតាគី ស្រុកថ្មគោល ខេត្តបាត់ដំបង និងជាង ១០០គ្រួសារ នៅភូមិកសិណ ឃុំថ្មពួក ស្រុកថ្មពួក ខេត្តបន្ទាយមានជ័យផងដែរ។

លើកឡើងនៅក្នុងឱកាសនោះ ឯកឧត្តមទេសរដ្ឋមន្ត្រី បានពាំនាំប្រសាសន៍ផ្តាំផ្ញើសាកសួរសុខទុក្ខរបស់សម្តេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងសូមចូលរួមការសោកស្តាយជាមួយប្រជាពលរដ្ឋ ដែលបានរងគ្រោះដោយសារទឹកជំនន់នេះ និងបានអំពាវនាវសូមឱ្យបងប្អូនប្រជាពលរដ្ឋឲ្យយកចិត្តទុកដាក់ចំពោះសុវត្ថិភាពរបស់ខ្លួនក្នុង ពេលទឹកជំនន់កំពុងវាយប្រហារ ជាពិសេសសុខភាពផ្ទាល់ខ្លួន ដោយត្រូវទទួលទានទឹកស្អាត ដើម្បីចៀសវាងជំងឺដង្កាត់ផ្សេងៗ។

ឯកឧត្តមទេសរដ្ឋមន្ត្រី ក៏បានផ្តាំផ្ញើដល់បងប្អូនប្រជាពលរដ្ឋដែលរងគ្រោះដោយទឹកជំនន់ទាំងអស់ ជាពិសេសក្រុមគ្រួសារដែលមានកូនតូចៗ និងចាស់ជរា ត្រូវយកចិត្តទុកដាក់មើលថែទាំឱ្យបានល្អ និងបង្កើនការប្រុងប្រយ័ត្នពីគ្រោះថ្នាក់លង់ទឹកជំនន់ ជាពិសេសត្រូវប្រុងប្រយ័ត្នពីសត្វអាសិរពិសគ្រប់ប្រភេទនាពេលទឹកឡើង និងពេលទឹកស្រកទៅវិញ ដែលវាអាចបង្កគ្រោះថ្នាក់ដល់ជីវិត។

ឯកឧត្តមទេសរដ្ឋមន្ដ្រី បានគូសបញ្ជាក់ផងដែរថា ការផ្តល់ជូនអំណោយនេះ ទោះបីមិនបានគ្រប់គ្រាន់តាមតម្រូវការរបស់បងប្អូនប្រជាពលរដ្ឋដែលរងគ្រោះក៏ពិតមែន ប៉ុន្តែនេះជាការយកចិត្តទុកដាក់របស់រាជរដ្ឋាភិបាល ចូលរួមចំណែកចែករំលែកសេចក្តីខ្វះខាត ទុក្ខលំបាកក្នុងជីវភាពរស់នៅក្នុងស្ថានភាពគ្រាអាសន្ននេះ។ 

ឯកឧត្តមទេសរដ្ឋមន្ដ្រី ក៏បានលើកឡើងនូវប្រសាសន៍របស់សម្តេចតេជោនាយករដ្ឋមន្ដ្រី ដោយសម្តេចមិនចង់ឃើញបងប្អូនប្រជាពលរដ្ឋស្លាប់បាត់បង់ជីវិតដោយសារលង់ទឹក និងដាច់បាយ ក្នុងស្ថានភាពរងគ្រោះទឹកជំនន់នោះឡើយ។

ជាមួយគ្នានោះ ឯកឧត្តមទេសរដ្ឋមន្ត្រី បានផ្តាំផ្ញើដល់អាជ្ញាធរគ្រប់លំដាប់ថ្នាក់ក្នុងខេត្តបាត់ដំបង និងខេត្តបន្ទាយមានជ័យ ត្រូវតាមដានឱ្យទាន់សភាពការណ៍ទឹកជំនន់ ដើម្បីជួយសង្គ្រោះប្រជាពលរដ្ឋឱ្យបានទាន់ពេលវេលា ហើយសម្រាប់ពលរដ្ឋដែលបានជម្លៀសមកកាន់ទីទួលសុវត្ថិភាពរួចហើយ ត្រូវដានពីសុខភាពរបស់ពួកគាត់ ដើម្បីត្រៀមជួយសង្គ្រោះឱ្យបានទាន់ពេលវេលា ក្នុងករណីមានជំងឺដោយហេតុការណ៍ណាមួយ ជាពិសេសត្រូវចុះចែកស្បៀងអាហារឱ្យបានគ្រប់គ្រាន់ផងដែរ។

សូមជម្រាបថា៖ សម្រាប់ប្រជាពលរដ្ឋដែលរងគ្រោះដោយទឹកជំនន់ទាំងជាង ៣០០គ្រួសារ ក្នុងមួយគ្រួសារទទួលបានមី ១កេស និងត្រីខ ១យួរ ហើយឯកឧត្តមទេសរដ្ឋមន្ត្រី បានប្រគល់តង់ចំនួន ១០០តង់ដល់អាជ្ញាធរខេត្តបាត់ដំបង ដើម្បីទុកប្រគល់ជូនពលរដ្ឋរងគ្រោះ និងបានប្រគល់សម្ភារបរិក្ខាជូនដល់បុគ្គលិក កម្មករនៃមន្ទីរសាធារណការ និងដឹកជញ្ជូនខេត្តបន្ទាយមានជ័យ រួមមាន ស្បែកជើង មួកសុវត្ថិ និងអាវ ១កំប្លេរ មី១កេស ត្រីខ ១យួរ ក្នុងម្នាក់ៗផងដែរ៕

Share this post

Post Comment